Iatevenne.
Quanti vvote ‘e sentute ‘sta parola
‘a vocca ‘a chi nun è iute, ma è rimast’.
“Iatevenne, ‘a ‘sta terra ca pe’ vuie nun po’ fa’ niente, ca t’affossa chianu chianu, ca t’affoca, ca nun sente”.
Iatevenne.
‘Na sentenza, sputate c’’a rraggia ‘e chi sape tutte cose, o almen’ ‘o pensa.
Ma ‘a finale n’ sape niente.
Crisciute quann’ ‘a fatica, “quella overa”,
steve pe’ tutte quante.
E te ricene:
“S’hanne magnate tutte cose ‘sti fetiente,
so’ rrimaste sule ll’osse, spuzzuliate senza riente”.
Ma sta gent’,
ch’ curaggie a ddicere iatevenne.
Aropp’ ca s’hanne gnuttute pure ‘e semmente, iatevenne?
A guagliune ch’ a trent’anne stanne a case ch’’e pariente,
ma fanne capa e mmure tutt’’e iuorne,
nda ‘stu posto chine ‘e mare, fantasie e pentimiente.
Ie nun parle.
Sì, a vvote tremme.
A fa’ paure, ‘o ssai, è ccosa ‘e niente.
Quatte bbotte nda nuttata.
Volle ‘a lave, scarfo ‘o sanghe già scarfate.
Ie nun parle.
‘Sta vocca nun ‘a arape.
P’ammore ‘e chi sta cca,
e ‘o sanghe ‘o ietta tutte ‘e iuorne pe’ vutta’ a campa’.
Ie stong’ zitte.
E sente ‘e vuommeche, ‘e fetenzie.
Veco ll’uommene ca fottene,
‘a mmiria, ‘a gelusie.
Veco ‘a genta bbona ca se lascia arete ‘stu paravise fracete.
Ca care a piezze.
E va luntane a cerca’ furtune.
Me lascie sola.
Ie sto cca.
Song’ a terre ‘e fuoco, n’ posso fui’.
Aro’ vaco?
Ma si putesse, nun dicesse iatevenne.
Ma turnate. Rummanite.
P’ avuta’ ’sta mentalità carogna,
r’abuse e futtimiente.
P’ accummincia’ ro’ capo,
e sarva’ quello che resta.
Nun me lassate cu’ sta gente.
Sì, questo dicesse.
Ie sto cca.
Turnatevenne.
